ADIOS

¿Dalgún se preguntó por qué nos llamen discapacitaos? ¿Dalgún se digno a comprobar cómo yera la mio enfermedá? Cenciellamente, llucho escontra la espasticidá que fae que se me pongan ríxides les partes del cuerpu de la zona drecha. Por mor d’ello tengo la necesidá d’una fonda tranquilidá qu’esfarrape a la mio enemiga, a la espasticidá. Tamién tengo dalgo tocada la cabeza, por eso se llama derrame celebral a lo que me dio, y nel mio caso trestocóme la sensibilidá, siendo fácil esfarrapame los sentimientos y facer que me sienta mal.

Nun ye fácil dexar lo que voi dexar, pero nun tengo más remedio que facelo. Razones de salú aconséyenme qu’esta seya la última vez qu’intente llevar p’alantre los mios blogs n’asturianu y emplegar Facebook (non pasa lo mesmo con otres redes sociales onde atopo más tranquilidá). Les lluches internes, les guerrilles, los llistos de la de dios, nun piensen que la xente pueda sofrir coles sos fataes.

Doi les gracies a xente que me fizo feliz, llogrando asina la mio victoria. Hai xente que paga la pena tar con ella hasta afogándose. Gracies a los collacios qu’espublicen tovía dientro’l grupu de Blogs n’Asturianu, cuido que’l so exemplu amuesa a les clares la posibilidá de compartir espaciu con persones d’otros sentires ensin matase. A la otra xente, a la que siempre anda a buscales, pensái enantes de facer les coses, non siempre’l que ta al to llau tien el vuesu puntu de vista, nin la fuerza pa llevar bien les vueses envestíes.

Asturies necesita lluchar escontra la xente que la fraya. La pena ye que dalgunes persones, pensando ser les sos valedores, fráyenla más que los sos enemigos.

El martes que vien, a les siete la tarde, apagaré los blogs n’asturianu y Facebook.

.

MAÑANA LLUEVE

 

Nun fae falta que miremos al home del tiempu na televisión, mañana llueve. Los discapacitaos como yo vamos tener un bastiazu descomanáu que nun nos va dexar ver lo que dalgunos llamen llibertá. Aforfúguennos de talamiente que nun somos nin a respirar l’aire podre qu’enllena cada requexu de los edificios públicos. Sicasí, nun nos tenemos de dexar acoquinar y mañana tenemos d’actuar en llibertá pero cola cabeza puesta nos que nos pisen.

Mañana llueve, pero tenemos paragües. Ánque-yos fastidie a los que nos miren namái como un oxetu de caridá.

Mañana llueve. Taría bien que se llevare consigo tanta mierda.

El martes que vien espublizarase'l segundu capítulu de la blognovela NON.SA, nun vos lo perdáis.


.

L’ORPÍN DE PRIMAVERA

 

Pinga y pinga l’iviernu hasta fartar al más santu. Nun hai barrizal que quede seco perdayuri d’Asturies nesta época del añu. Llega a tal la cosa, que dalgún fae novenes a Nuberu pa que pare tal desaguisáu. Nun sé si son efeutives o non tales plegaries, pero paez que se consigue que la primavera cuerra como una lloca pa ser a llanzar a l’iviernu a casa la guaxa. Sicasí, l’agua nun dexa de visitanos anque seya d’una mena más sele. El color d’Asturies nun se va sinón que se multiplica por mil coles milenta flores que nos remembren que tamos na estación de les Lletres, de la Llingua de nós, de la nuesa casa tan desdexada polos poderes paletos que nos gobiernen, o meyor dicho, que los dexamos gobernar.

Esti orpín primaveral ye también lo que recibe la Llingua Asturiana, gotuques delantre los remexones que recueye’l castellán na nuesa tierra. Pero nun faería falta tanta agua como se piensa, les intenciones son de más valir, asina como facer les coses con chapeta y dando siempre pasos pa endelantre. Dalgo asina como ciencia ficción mentanto nos gobiernen (tanto  gobiernu como oposición) esta gandaya d’otra galaxa. Les manifestaciones tán bien, pero ta meyor que nos movilicemos el día d’eleiciones, hai que votar en conciencia y facer pensar a los vecinos pa que nun voten a lo xo.

Nun sé si dalgún día conseguiremos la OFICIALIDÁ, ye más, nun sé si dalgún día llograremos ser autónomos de verdá. Equí faennos xirigoncia hasta Ceuta y Melilla. Lo que sí se va llograr ye que’l Dia les Lletres, a les 9 la mañana, s’espublice nesti blog el primer capítulu de la blognovela NON.SA. Entamará dalgo qu’enxamás sedréis a escaecer, una historia que nos averará a Perlora y que va facenos… Meyor que la lleáis.

.

MUNDIOS

 

Hai quien diz que tenemos vida estraterrestre a mamplén fuera d’esti planeta. Qué n’otres galaxes podemos alcontrar tierres enllenes de xente intelixente. Pero son camientos que nun dexen de ser vacallories mentanto nun seyamos a demostralo y, ai collaciu, eso ye abondo abegoso.

Sicasí, nesti’l nuesu planeta, pues alcontrar tantos mundios como persones somos, hasta diría que pa dalguna xente los mundios son ainda más que los deos d’una mano. Caún ta zarráu nel so planeta y escaez que na vida esiste la pallabra compartir.

Sí, tamos en crisis. Nuna crisis que va más p’allá de problemas económicos. Nuna crisis que fala d’egoísmu, d’individualidá en cuentes de coleutividá, de lluches de poder hasta pa saber quién va partir un mísere merucu. Nuna pallabra, soledá.

Hasta que nun seyamos a dar cola salida a esa soledá nun vamos ser a fuxir d’esa crisis moral, que non relixosa, qu’aforfuga a la humanidá y que nun la dexa vivir la vida con esperanza.

Hai quien diz que tenemos vida estraterrestre a mamplén fuera d’esti planeta. Qué n’otres galaxes podemos alcontrar tierres enllenes de xente intelixente. Quiciabes l’home, cuando los descubra, seya a saber lo que ye ser intelixente.

 

Torne de nueves tres una meditación nel ermu. Paez ser que yá sé pa onde voi. Col tiempo vais decatavos d'ello. Pa que vos empixéis, nesti blog va a apaecer una blognovela... Pero nun nos apuremos. Too va dir a tatás. ¡Cómo tien de ser!

La blognovela va entitulase NON.SA y va desarrollase en Perlora.

.

.

CAMÍN

 

 

La vida enllénase de caminos que munches veces nun yes quien a saber ónde te lleven. Tasques la cabeza, mires enfurruñáu y xubes los costazos en señal d’indiferencia finxida. Sicasí, cavilgues y cavilgues intentando dar con ello ensin ésitu dalo.

Hai cinco años y picu entamé un camín abondu abegosu que nun soi a endrechar en condiciones. El camín de los blogs aidóme a escaecer la enfermedá y llograr vencer l’afasia que venía apegada a ella. Agora, después d’esi tiempu, viénenme les duldes del trayeutu a siguir. Nun sé pa ónde tirar; pa ónde dirixir la mio búsqueda de nuevos finxos, de nueves siendes... Por eso esti blog apaez y desapaez como les playes asturianes coles marees: sé que l’espaciu de Cordobello, un blog mui aquello ta percorríu (anque torne nun futuru) pero’l d’agora, NON,  nun ta trazáu. Quiciaves seya eso lo que tien de ser, nun tar trazáu, sicasí soi home que me presta saber direiciones, conocer señes d’identidá que me den una seguridá de lo que faigo. Lleí otros blogs que me dieren pistes, que m’aconseyaren formes de ser, y permitiéronme saber lo que nun quiero ser. Ye perdifícil dar col quiz, dar cola oriella perfeuta... Voi intentar garrar la marea correuta que me faiga andar pola playa de NON. A veces pillaráme l’agua p’arribones. A veces tracamundiaréme y tiraré pa una ría en cuentes d’una playa. A veces… Nun sé. Meyor falar menos y facer más.

Pa entamar, nada meyor qu’empezar con un descansu. A metanes d’abril taré de nueves equí pa llograr que’l blog nun seya un naufraxu.

.

AFASIA

 

 

Fo aquella mañana d’iviernu cuando me decaté que la mio afasia enanchábase con una nueva pallabra. Seliquín, pasu ente pasu, los vocablos lluchaben por nun salir de la mio boca.

Too entamare al querer mercar una moto, dalgo me dicía qu’había una marca cola que nun  cuntaba, que nun yera a altravesar los mios llabios, pero d’entos p’acá nun soi consciente de qu’esista de verdá. Depués fo al rellatar un suañu a un collaciu, la mio actriz favorita averaba la so llingua a la de mio y llantábame un besu de restallu. La muyer que m'acompañare más d’una nueche ríase de min cuando nun me salía’l so apellíu. Yera dalgo asina como la marca d’unos amortiguadores, pero que si quies arroz… ¡Qué cosa más arbitraria!

Esta vez tocó-y a un refrescu del que malpenes m’alcordaba d’una sola lletra. Percorrí tiendes, chigres, chiringuitos… y en dengún m’alcordé del porcayu nome. Fo cuando me decaté que nun yera l’únicu que sufría d’esa afasia. Yera más, dime cuenta qu’había insolidarios que se ríen de nós mentanto bebíen d’aquella marca esquirola.

.

SOLEDÁ

 

Non, nun ye que té solu, toi acompañáu conmigo mesmu. Nun me fae faltá más. Lloñe queden aquelles dómines nes que siempre me facía falta tener xente al rodio míu. Nun ye qu’aquello tuviere mal, pero tampoco ta mal esto. Cada cosa nun tiempu y cada tiempu con un finxu claru. Agora préstame la soledá, anque de xemes en cuando té con un familiar o un amigu compartiendo un migayu de vida.

Hai xente que tien mieu a l’ausencia de ruíu, anque namái seya’l d’un merucu faciendo camín. A la mio persona aídalu a cavilgar el silenciu acompañante que t’enllena de pensamientos la cabeza y de paz la esistencia.

A min préstame tar conmigo mesmu, el meyor amigu qu’ún tien.

.

PROPUESTA 1

 

 

La xente político tien la obligación de servir al pueblu pol que fue escoyío y enxamás actuará por intereses personales o de partíu faciendo dañu a la xente llano. Poro, cuando se fala de Presupuestos Xenerales pa un añu tienen la obligación de llegar a un alcuerdu y dir p’alantre con ellos. Non facer esto llevaría-yos a qu’esi añu, tanto los partíos como les sos señoríes, cobraríen namái el 25% de los salarios que teníen previstos. Cuando nun cumplen dalgo tan elemental, amuesen a les clares la so incompetencia y tienen de ser amenorgaos nes cuantíes a percibir. Esta norma llevaríase p'alantre colos partíos de gobiernu y también colos de la oposición.

.

IVIERNU

 

“Poques veces l’agradable Armórica conociera los emburriones tempestuosos d’un iviernu tan duru” diz l’entamu del caberu Axtérix n’asturianu. Sabemos abondo d’iviernos na Bretaña y Asturies como pa dexalos correr ensin ser a abellugase de xemes en cuando na memoria. Porque los nuesos iviernos nun son estacionales sinón de dómines y dómines de dominiu foriatu que desprecia ensin consideranza la nuesa riqueza cultural.

El problema ta qu’anguaño somos nós los que despreciamos lo nueso y abrazamos lo que vien d’afuera ensin cavilgar un migayu nel futuru, nel presente, nel pasáu, nel nuesu pueblu…

Nun miren pa nós. Nun nos nomen nos sos periódicos, radios, televisiones, conciencies, …, porque nun esistimos pa bien o pa mal, somos un requexín que nun paga la pena considerar. Non, nun cuntamos nin pa facer esllava.

Lloñe queden les dómines de reis, espades y arguyu. Represos tamos hasta los que pensamos na nuesa tierra como’l país más rebelde que dominare l’estáu católicu. Nun somos nin a xuntar un par d’esperances enantes d’engarranos en sigles de pureza que fraya’l nuesu presente-futuru.

 

 

.

NON DE NUEVES

Non, nun ye que seya negativu sinón vindicativu.

Cuatro meses, cuatro, suañando con ser a vindicar nel blog les coses que diben pasando pel mio maxín y l’ordenador faciéndose’l llocu alloñáu de min. Munchos asuntos qu’agora pasaren d’actualidá y que sedría fato espublizar. Munchos otros que tienen d’esperar a les ganes de ser escritos. Munchos escaecíos que quiciabes dalgún día tornen a la mio cabeza y que nin siquiera sedré a reconocer…

La vida son momentos que s’escapen pente los deos como agua de montaña brava que desembarca nun deséu  d’alcordanza. Ser o nun ser. To be or not to be, que diría Shakespeare llucendo pluma d’animal rimáu.

Al fin de cuentes, tornaré a escribir les pallabres que dexaron afitaes munchos asturianos a lo llargo de la historia. Esa historia d’inxusticies que dexaron a la nuesa tierra probe nel so futuru.

 

.