LA VIDA

Escaez al candáu de la vida

y permite esconsonar corazones

en máxiques llunes

que marmullen,

que dexen cayer

         piyames

al llagu de la conciencia,

de la sable

qu’esvaría

a la fola,

demientres los pexes

garren les cañes

pa pescar ilusiones

a los gatos que se cañiquen

en fueyes

nes que ta escrita

namái

una

pallabra,

la pallabra,

la única,

amor.

Llegaron les vacaciones asina que nos vemos el 16 de xineru del 2017 cola flash fiction de Los Payares entitulada Señardá. Hasta entós, ta llueu.

.

LA BODA

El besu garróme fuera sitiu, esteláu, mirándola prestoso ensin más. Tengo d’almitir que tar xuntos facíanos más llevadera la universidá, pero…, nun sé como dicilo, nun taba preparáu p’aquel besu. Cuido que les coses teníen de dir más despaciu, por embargu ella yera como un torbolín, como un españíu en metanes la calma. D’aquel besu pasamos a la cama; siguiendo la mesma lóxica punxímonos a vivir xuntos; y ensin saber cómo, ella quedó embarazada. Pero tú nun tomabes la pastilla dichosa. Síiii, nun soi a desplicámelo, cariñín. Na so voz too parecía de lo más natural, menos aquello. Cielín, nun te pongas asina, de xemes en cuando la pastilla falla. Cómo que de xemes en cuando falla, la pastilla ye infalible si la tomes. Porqué tú tomábesla, non. Bueno, yo quería un fíu tuyu, yes tan guapu. Esto ye l’acabóse, soi tan guapu que dexó de tomar la pastilla pola so cuenta ¿Quién me manda a min enrollame con una Payares de Figaréu, la flor y nata ente los fatos? Tenía de salir, home, los mios apellíos son siempre culpables. Non, non, non, nun quería dicir eso, quería dicir que los Payares de Figaréu nun sois d’esti mundiu de vulgar carne y güesu. Y agora quedrás que pida a los mios apellíos gloriosos que saquen el talonariu y se paguen un albuertu. Pues das en duru, nun son tradicionales nin nada ellos. Capaces son de meteme nun conventu hasta que tenga al neñu y dalu n’adopción. Val, nun pienses que soi a escaqueame, casémonos güei o mañana. De testigos pueden dir dos amigos cualquiera. Fairíaslo por min. Sí. ¡Ai, cielín! Voi mercar el vistíu más afayadizu pa la ocasión. Non, non, cualquier trapín de los tuyos servirá. Nun me vas dar nin siquiera esti antoxu. Val, vémonos nos xulgaos.

Probetayu de min, pensar que con aquello yá taba tou iguau. La neña alcontróse, por casualidá, con so madre na cai de más cocorocó y los glayíos oyéronse hasta nel desiertu’l Sahara. Cielín, que diz mio madre que tien de celebrase na capiella familiar y colos parientes más cercanos. Cómo-yos desplico yo a mios padres tola engatada siendo como son unos ateos convencíos. Failo por min cariñín. Y, tal como imaxinaba, fui echáu del reinu los cielos ateos, onde me  zarraron la puerta al gritu de tú quies matanos. Meyor asina anxelín míu, d’esa mena evitamos les guerres familiares. Pero son mios padres. Facémos-yos depués una boda polo civil. Tas segura que van almitir eso. Perdona tocinín mío, la mio familia engatusa a cualquier obreru. Oye, que mios padres sedrán obreros, pero a cultos nun los ganen los tos apellíos. Pues meyor tovía, mandámos-yos les obres completes de Corin Tellado, pondránse llocos d’allegría. Pero tú que te pienses, tengo la casa enllena llibros de los meyores escritores de tol mundiu. Y toos lleídos, non como na to casa.

Nun me decaté de la que me taben a armar, soi pazguatu a rabiar. Mansulinos, asina como quien nun quier la cosa, la llista de convidaos fo enanchándose como’l bombu la neña: que si ye que toos estos son como de la familia; que si nun los convidamos van enfurruñase y armar la de dios; que si qué más te da a ti si tos padres nun van dir. Depués vinieron los negocios familiares, yeren compromisos a los que nun se podía ún zarrar; pero, qué diba a saber yo d’eso. De la to familia hai 746 convidaos y de la mía nin el tatu. Yá tamos colos tos egoísmos d’obreru. ¿Egoísmos? Sí señor, egoísmos y envidia. Pero de que tas a falar, la neña de pistu a esgaya que nun ye a mover un deu ensin que dengún criau cuerra a facé-ylo. En serio pienses eso de min. Yes un babayu. Vamos, nun nos pongamos asina. Tamos a tiempu de casanos pel xulgáu y colos meyores collacios de padrinos. Queda una selmana. Ta bien, ties razón tocinín, prepáralo too pal día la boda, cuando toos nos ten a esperar, nosotros taremos nel xulgáu casándonos. ¡Quiérote! ¡Yo a ti tamién, tocinín!

Y llego’l día. Los testigos y esti fatu fuimos puntuales. Ella, como siempre, llegaba tarde como desixe la etiqueta. Dimos vueltes y vueltes ensin ser a parar; mordimos hasta les uñes los pies; falamos y falamos pa ser a parar los nervios; hasta que la secretaria del xulgáu avisónos que’l xuez diba colar. Baxamos les escaleres como’l que vien de la derrota de Cuba. Abaxo, esperábanos un criáu de los señores Payares de Figaréu pa entreganos una carta. Abríla ensin rechistar.

Señor Jose María Álvarez Fernández

Tengo l’honor d’informa-y que la mio fía Cuca Covadonga Pelaya Sagrario Payares de Figaréu y Diaz del Prau Expropiáu casóse güei col noviu que-y teníemos preparáu de tola vida, que la va facer feliz pagando-y tolos caprichinos qu’usté nun diba ser quien a ello. Nun m’agradeza esti favor tan grande que-y faigo y que va ser a entender col tiempu. Nun sabe de la que se llibró y el bien que-y fizo a esta familia, que llogra con esti matrimoniu meyorar la so posición económica. Queda rendíu a los sos pies esti home de cuna vieyo y economíes siempre a la cabera pregunta.

La firma yera d’eses que nun sabes bien si ye un cascoxu estruxáu o un llimiagu encebolláu. Yo nun sabía si llorar o riir. De sópitu, la madrina diome un besu d’esos que llamen de película. Dígovos la verdá, prestóme pola vida. El padrín, cola mirada nos mios güeyos azules, apurrióme otru besu de campeonatu. Depués d’ello, fuimos los tres a vivir xuntos y mercamos una cama na que fuimos mui felices, ensin importanos nin lo más mínimu ser del proletariáu.

El 19 d'avientu taremos otra vuelta con toos vós con otra poesía entitulada La Vida. Hasta entós, ta llueu.

.

SILENCIU

Semiente de silencios,

alborecedora de tristures que,

sele,

dexes la vida

sola,

escosa

d’infinites conciencies que,

lladines,

naveguen pente mares vacíes,

ríos enllenos de secaños,

llagos de duldes que,

atuñaos,

miren pa l’angustia

abellugada ente callares,

ente prieses que

lleven

y

traen

los xilgueros ensin voz,

ensin aliendu,

ensin xaciu.

El 5 d'avientu taremos de nueves con toos vós con una flash fiction de la coleición Los Payares entitulada La Boda. Hasta entós, ta llueu.

.

XUGANDO A EXECUTIVOS

Enxamás nun viere un reló de fichar que se pareciere al d’aquella empresa na qu’entamaba a trabayar. Les aguyes corríen como llocomotores al debalu, dándo-yos lo mesmo dir p’alantre que p’atrás. Picares la ficha onde la picares, siempre marcaba les hores del conveniu. La entrada ordenábala’l fíu’l xefe, Payares Yunior, direutor de personal, qu’acordies a les necesidades del día mandábanos entamar a la hora que-y petare, siempre enantes de la del conveniu, claro ta. Demientres executábemos les xeres, él yera l’únicu n’emplegar el modernu ximnasiu d’empresa, exemplu modélicu pa visitantes que naguaben por invertir n’industries punta.

La hora salir poníala’l señor Payares, padre de la criatura y direutor xeneral, que llegaba a la empresa depués d’una bona siesta que ponía orden a una abondosa comida. Ente rutíu y rutíu gusmiaba pente’l llabor de los trabayadores, nun escapando a la so xabaz revisión nin siquier l’esfuerzu les cuyarapes. Si a dalguién se-y ocurría gorgutar pa salir a facer dalguna obligación, el vieyu arremellaba los güeyos, gufaba como un verracu y llanzaba una inspeición xeneral de la que nun salíemos hasta bien entrada la medianuechi. Nun yera raro qu’ésti que vos fala llegare munches veces pa la cama tremando como un rapacín y enllenu velees que malpenes me dexaben dormir.

Pasiquín a pasu, Manufactures Payares S.A. resintióse de la crisis global que truxo la entrada d’Asturies na EU y de la que nun nos llibramos enxamás. Les ganancies baxaron a galmiaes y los gastos de tan candial familia xubíen a tou meter. Dengún conseyu d’asesor de grandor y renome yera almitíu por aquellos que se pensaben tocaos pola mano de dios. A piques del mayor hostiazu que se remembrare na economía mundial, una multinacional venida d’un de los países de los cuernos fizo una ufierta que los Payares nun fueron a rechazar. Fo tan cacarexada la firma que les televisiones llocales nun dexaron pasar la oportunidá de falar d’ella nes tertulies. Ave María, canal exemplu de fé, decatóse que la multinacional quería la entrada dafechu de muyeres trabayadores na empresa. Les voces más pures nun dexaron pasar la oportunidá de falar de la Santa Cruzada y del papel femenín de la muyer naquella llucha: curiar la casa del amáu maríu y da-y fíos a mamplén. El vieyu, que debía la so fortuna al réximen, negóse dafechu a firmar con tan sacrílega firma. Los sos herederos, viendo que se-yos diba’l chollu, nun duldaron n’arrodiellase delantre l’aguafiestes y pidi-y polo más sagráu qu’almitiere la petición si nun quería esfarrapar el negociu. Almitió too si la multinacional los cuernos ponía de direutor al so fíu mayor, pa d’esta mena suavizar el fechu les muyeres.

Payares Yunior tomó desiguida posesión del cargu inaugurando un ximnasiu xigantescu que tuviere una entrada especial pel so despachu. Los xefes de los cuernos mandáron-y una valquiria que controlaba a la perfeición el negociu. Él llamábala cariñósamente la so secretaria personal. Ella contrató a muyeres cualificaes, que Yunior llamaba les gueixes cantábriques, y que facíen tol trabayu de los machos de la neurona que gastaben el tiempu col so xefe nel ximnasiu. Diba tou a la perfeición: muyeres y enxencles desendolcábemos tol trabayu mentanto los musculinos combayaben con Yunior y visitaben a los clientes.

La valquiria recibió órdenes de los xefes con cuernos nes que pedíen una meyora de resultaos. Yunior mandó-y que se tranquilizare, que tenía la solución perfeuta. Despidió a la empresa de llimpieza y mandónos a muyeres y enxencles que fueremos una hora enantes pa facer esi llabor. La valquiria reburdió too de siguío y garró’l teléfonu móvil al que-y glayó como nunca la oyéremos enantes. Mandó que-y sacáremos billetes d’avión y salió toa escopetada pal aeropuertu.

Yunior viose llibre d’aquella roxa de caldares de buen ver y entamó un tornéu de golf qu’hai tiempu tenía na cabeza. Amás d’él, participaríen los sos músculos favoritos. Escoyó’l premiu que diba ganar y mandónos a tolos enxencles de recueye pelotes pa los más gafes y p’arrecostinar colos palos, tanto pa dalos como pa recibilos. El trabayu de la empresa recayó dafechu nes muyeres, que víen como facer más y más hores estra a menos y menos salariu, acordies al troféu, diba n’aumentu. Dalgunes muyeres, fartes da tantu despreciu entamaron una güelgona a la que fueron elles y tres de nós, los enxencles más concienciaos. Yunior nun tuvo misericordia con nós, púnxonos na cai ensin dengún tipu de negociación.

La valquiria tornó engafetada y mandó facer una xunta urxente de tolos trabayadores. Los despedíos recibimos llamaes convidándonos a asistir. La entrega de premios del tornéu de golf túvo faciéndonos esperar cerca tres hores.

-¿Quién s’atreve a parar tolos actos con motivu del pieslle del tornéu de golf?

-Señor Payares Yunior, yo mesma, a las qu’usté llama la valquiria, anque d’alemana tengo poco.

-¡Queda despedida!

-¡Home! Sedría la primer vez qu’un subordináu echa a una xefa. Tien gracia. Pero vamos al asuntu. La multinacional ta pol llabor de diversificar los sos negocios y va entamar a esparder los ximnasios per mediu mundiu. Estos primeros va llevalos usté, señor Payares Junior, y los sos musculaos.

-Sedrá un honor. Sabía que’l nuesus equipín taba preparáu pa finxos más altos.

-Nun dulde usté no de más altos. La primer remesa va llanzase en Groenlandia. Yá los tán esperando colos sos graos baxo cero.

-Esto tien de ser un enquívocu.

Quedamos toos estelaos. Teníen-yos preparaos traxes climatizaos y dellos helicópteros llistos pa salir. Esquimales forníos nun los dexaron marchar del so futuru destín. La risión fo abondo. Paró cuando la valquiria nos mandó tornar al trabayu y xente con cares fríes nos esperaben nos despachos pa organizanos caún de los minutos del nuesu tiempu. Ye lo que tien ser proletariáu.

 El 21 de payares tornaremos con una nueva poesía entitulada Silenciu. Hasta entós, ta llueu.

.

ROSA DE MIO

Silenciu de vida,

tristura qu’enancha l’alma

pa que nun espierte,

pa que nun esprecete la mar.

Remembro so guapura

trespasando la escuridá del camín,

esporpollando la rosa de mio,

la perla qu’enllena la mio esistencia,

ella,

mio madre,

la que me dio dos veces la vida,

la que me dio dos veces l’amor.

Suerte

de sentila,

d’amala,

d’abrazar caún de sos sentimientos,

caún de sos desvelos.

Silenciu de vida,

que vive pa l’alcordanza

de so xenerosa presencia,

de so candial amistá,

de so abierta maternidá.

Enxamás sedré a escaecete, Madre, yes pa min l'amor que nun voi ser a finar nel tiempu que té nesti mundiu. El 7 payares tornaré cola flash fiction Xugando a Executivos.

MALDITU GARAXE

Échote de menos cada minutu, fíu. Qué cada minutu, cada segundu, cada décima segundu, o micra, o lo que te pete que seya la midida de tiempu más piquiñuca. La vida tresformóseme dafechu y toi tol día sollerte a cualquier ruiu que salga del garaxe, del malditu garaxe onde, ensin que de mano me decatare d’ello, averástete a to padre y empezaste a copiar la so zuna. Siéntolo muncho nun tenete xixiláu con más cuidáu pero, qué quies fíu, dalguién tenía de salir a ganase la vida pa ser a mantener la casa. Cuando tabes en colexu tocábame facer les xeres la casa y, de la que volvíes, colaba a llimpiar oficines hasta les tantes. ¡Vamos, qué nun nos veíemos más que p’almorzar! Intenté pagátelo los fines de selmana, dándote’l ciñu y el procuru que te merecíes, pero paez ser que nun fo a esgaya. Dexéte nes peores manes posibles, les de to padre. El mui llacazán namái gastaba les hores naquello que’l llamaba ciencia, anque fuere más bien chapuces. Nun aidaba nin un rispiu na casa cola sida que’l bon inventor tien de tar trabayando cuando llega la inspiración. ¡Cómo si él supiere’l significáu de trabayar! Vamos dexalo pa práu o aínda me refierve más la sangre.

La primer vez que tuve un niciu claro de lo que taba a soceder fo cuando’l mui fuín se presentó delantre min col inventu la so vida. Tuve de saber que la cosa fuere tuya. Yes un Payares dafechu, de la mio familia, de la xente competente. Un poviseru que recueye’l fumu xuntu a la povisa necesita abonda cabeza pa sacalu alantre, en cuentes d’andar a estudiar cómo esnala una mosca cola fin de llanzar un prototipu d’avión de calter solar. Fo l’inventu col que lu conocí y que nunca nun fue a pasar de la observación ramplona del inseutu. Hubo munches empreses interesaes en llanzar el poviseru pero to padre tuvo d’esfarrapar les espeutatives. Dixo que lo meyor yera esperar a que s’engarraren ente les compañíes p’asina saca-yos hasta l’últimu euru y lo que sacaron fo la llei antitabacu. Él como siempre dándo-y brillu a la neurona.

Aquello envalentonóte y fo cuando me cuntaste que queríes ser inventor como to padre. Tuve de garrar aliendu y dicite que podíes selo si enantes pasabes pela universidá. Nun tardasti nin un rispiu en dicime la carrera; tovía ye’l día de güei que nun soi nin a pronunciala. Coles notes que sacasti nel bachiller y el celebru que dicíen que teníes tolos profesores desiguida t’apaeció beca. Taba tan contenta, el mio neñu sorteábenselu toles universidaes europees. Hasta que llegaron los yanquis colos dólares cayéndo-yos de los bolsos y cegáronte. Marchasti dando coles pates en culu y perdíti dafechu la pista. To padre reñóme hasta fartucar asegurando que yo namái quería de cortate les ales. ¡Ai fíu del alma! Lo que nun-y prestaba nin un migayu yera nun ser a zabarciar lo de les perres que te diben dar. Al mes coló pa contigo pol aquello que los americanos podíen engañate. Como si nun supiéremos quién te diba esplumar.

Mandábesme periódicos nos que se falaba de la importancia los tos trabayos y la carrapotada de premios que te daben. Bueno, eso me cuntabes tú, porque yo d’inglés nin papa. De xemes en cuando apaecíes nes fueyes parroquiales d’esti llau la mar, desplicaben que yeras el gallu la quintana en yanquilandia. Tolos recortes diben pa un álbum qu’abrí pal mio neñu. Toos menos ún, esi nel qu’apaecía una semeya tuya na que se vía no fondero a to padre abrazáu a una muyerona y dándo-y un chuchu. Nun fuí a entender porque me lo tapabes. La carta que te mandé rellatábalo mui bien. Ante tou, dalgunes pallabres diben corríes poles llárimes que nun fui a parar. La fregona mandándote tolo que yera a ello pa que nun te faltare de comer y tú dándo-ylo a to padre pa fundilo en muyeres. ¡Qué deceición! Nun volví escribite y mandéte l’album de recortes col reportaxe de marres ensin pegar.

Aquel branu averásteti a casa col chaploteru del to proxenitor. ¡Vaya par! De xuru que nun vos quedaba nin un euro al nun mandavos yo la soldada de probetaya. Traíeis la cabeza gacha y la llingua pastosa pa dar desplicaciones. Ficísteisvos de nueves col garaxe, onde desplegasteis tola maquinaria del últimu inventu. Dicíes que yera una máquina del tiempu que yá tabeis a probar. ¡Vaya gochada d’ardiluxu! ¡Ai, si nun fuere por min! Garré tolos productos de llimpieza que sacaba del trabayu y púnxeme a esfregar hasta la cabera tuerca. Tando nello, decatéme que dalgo que tinía grabáu botón de vuelta pa casa atopábase un migayu floxu. Peguélu con cola, nun fuereis a echame a min la culpa, y marché a les carreres.

A les dolce’l meudía escuché un estrueldu nel garaxe y enfilé a toa mecha pa ver que yera. Nin vos despedisteis. Fui namai a ver el botón de vuelta pa casa separtase’l restu la máquina y cayer al suelu. La mano chocóme escontra la frente y salióme un cagamentu. Escaeciéraseme la zuna que teníeis de cambiame les coses de sitiu. Empobiné pa onde taba’l bote la cola y atopéme con que yera ún de disolvente. Y equí vos toi a esperar hai yá venti años. Pero paez ser que nun fuisteis a iguar el problemucu. Pensé que yerais más llistos. ¡Ah, gracies por dexar los planos la máquinuca! Toime a forrar.

Torna de nueves Los Payares y tola carrapotada d'aventures, espero que vos preste. Con ellos van venir poemes, proses poétiques y una nueva flash fiction llamada Sociates que se ta cociendo agora. Taremos de nueves con vos el 17 d'ochobre con una poesía entitulada Rosa de Mio dedicada dafechu a mio madre muerta n'agostu y corazón de mio corazón.

.

ENTÁ VOS QUEDA VIDA

Espiertes en metanes la nueche, en metanes la vida, porque oyes entecortáu l’alindu de la persona al llau tuyu, entecortada la dulda del que nun sabe cómo aselar tanto dolor. La tiesta nun dexa de date vueltes, de naguar por ser dios, por alcontrar el remediu a esa enfermedá qu’espingaratia la to esistencia. Nun ye tuya la malura, pero como si lo fuere; nella ta allugada la tranquilidá qu’enllena’l to camín. Cuando la necesitabes, tuvo ellí; y agora tócate a ti. Suena l’espertador. Llevánteste y prepareis la melecina la mañana. Míresla y das-y un chuchu de bonos díes. Esfrutes de cada segundu al so par, al so cariñu. Les llárimes son a esperar, entá vos queda vida.

Díxevos que de xemes en cuando diba espublizar una prosa poética a lo llargo d'estes vacaciones. Equí ta la primera. Otres dirán surdiendo migayu a migayu hasta la fin d'esti periodu de descansu. El so final quiciabes s'enanche hasta payares, tou se debe a unes obres na casa. Ta llueín.

.

SEXU

.

Con esti final, dando'l campanazu, el blog NON vase de vacaciones. Tornaremos de nueves p'hacia'l mes d'ochobre con nueves flash fiction de Los Payares y más poesíes. Necesito'l descansu como'l comer pa ser a siguir. Les secueles del derrame dícenme que pare de xemes en cuando y yo soi mui obediente. Sicasí, a lo llargo la parada, de xuru qu'apaecerá dalguna prosa poética espublizada nel blog, asina como quien nun quier la cosa, pa ser a quitar el monu. Hasta la vuelta, pasáilo de mieu.


Nesti branu nun sedría malo que lleereis el mio llibru de microrrellatos escritu al poco sufrir el derrame: Orbayu Seco, 101 Microrrellatos. Pasín a pasu atoparéis histories de lo más afayadices. ¡Qué lo disfrutéis!


.

LA VIDA SIGUÍA

Enxamás nunca nun pense que llegare a producise aquella llamada teléfonu na mio vida. Echare’l currículu por echar, ensin denguna esperanza que lu seleicionaren. La voz presentóseme como l’auténticu chef Payares, l’home que punxere pates p’arriba los fogones de mediu mundiu. Dixo tar interesáu en cuntar col mayor conocedor de cócteles de la ciudá, yo mesmu. Quedé axorizáu. Taba seguru qu’aquello nun lo punxere nel currículu. Quería qu’entamare aquella mesma nueche a trabayar nel so restaurán Payares&Company. Miré pal café que taba tomando d’almuerzu a la espera d’alcontrar dalguna señal de sicotrópicos nél. Refugáu d’ello, plizquéme pol aquello de tar seguru que taba espiertu. El dolor nun dexó dulda dala. Tatexé; carraspié’l gargüelu; despliqué que tenía contratos p’actuar poniendo cócteles nos pubs de más renome del país; díxome qu’él iguaría tou; alvirtióme que la nómina nun superaría lo que ganaba coles mios actuaciones; díxe-y que nun m’importaba. Na mio cabeza namái que refervía la idea de cómo diba enanchar el mio currículu aquello. Vínome al maxín una coctelería, la mio propia coctelería, enllena xente esperando al rei de copes del mundiu mundial. Esperte del suañu. Payares siguía al aparatu, falándome. Dixo les pallabres máxiques: tendras de tar nel mio llocal a les seyes en puntu de la tarde, nun me presta la impuntualidá.

Probé milenta traxes enantes de dar col correutu pa la ocasión; echéme na cara tolos potingues qu’había pel bañu; ensayé cola coctelera delantre l’espeyu hasta fartar; y llegó’l momentu marchar. Salí a galmiaes de casa, garré l’autobús, baxé xustu delantre’l lletreru de Payares&Company y, colos nervios, zarapiqué como un fatu al entrar nel restaurán. Les risotaes sacáronme los colores ya intente fuxir d’ellí. Una mano frenóme nel camín. El chef Payares entraba naquel precisu momentu.

-Eso mesmo me pasó a min el primer día. Un bon auguriu d’ésitos.

Y asina fue. La clientela de mayor ringorrangu del tol país paseóse pel restaurán. Enantes d’entrar a tastiar el cielu culinariu paraben a falar con otros contertulios de la que prebaben les mios mestures máxiques. Desiguida apaeció xente que namái naguaba por beber los brebaxes, asina tou teníen d’entrar a cenar obligatoriamente. Les felicitaciones entamaron a cambiar de receutor. Un cocineru d’altor desplazáu por un neñu que namái sabía que da-y fuerte a una coctelera. Si por Payares fuere echaríame nun plis-plas, pero los socios nun-ylo aconseyaron. Decidió nun poneme cara, facer como si nun tuviere nel llocal. Nun fue quien cola pelusa y escomencipió a baxar la calidá de les mestures que diben na bebida. Probe, nun sabía que yo viaxaba colos mios propios productos. Cuando naide nun me vía, camudaba unos por otros. Por muncho que mirare nes cares de los clientes, éstos nun facíen nin un xestu de desagráu. Baxó y baxó’l nivel de calidá día a día. Aumentaron y aumentaron les felicitaciones cada segundu que sirvía los cócteles. Payares abeyeba de la cocina a la barra más de la cuenta y el restaurán baxó na comida. Naide nun falaba yá con él. La tensión tastiábase nel ambiente. Un día, asina por casualidá, apaeció un pelu nun cóctel. Los glayíos que soltó dexó a los clientes ablayaos.

-Señor Payares, esi pelu nun pue ser de mio, llevo’l pelo al ún. Tien tola pinta de ser de muyer: llargu y teñíu de rubiu.

L’odiu dibuxóse na so cara. Gufó y pasó pa la cocina. Riíme. El pelu tenía apellíu y entamaba por p.

Hebio un tiempu de relaxación nel ambiente. La comida tornó a ser mui buena. Los cócteles siguíen namorando a la xente. Les mestures entamaron a traémeles d’Asia y África. Programes de radio y televisión falaben del mio arte. Nel aire surdió la idea de camudar el Payares&Company pol cenciellu &. El chef amenazó con dexar el restaurán y montar otru con socios de más renome. Recibió’l mio sofitu asegurando a la Company que yo nun sedría naide ensin él. L’odiu aseló un migayín nos sos güeyos. Namái’l tiempu de garrar aliendu ya intentar montámela otra vez. La envidia ye lo que tien, ciega a los que se piensen grandes.

-Van trayer unes copes de diseñu pa que les estrenes nel momentu –díxome tou gayoleru-. Los tos cócteles merécense lo meyor –a cada pallabra poníame más en guardia-. Tengo d’agradecete’l to sofitu colos socios –hasta ehí podíemos llegar, la modestia y l’agradecimientu nun se ficieren pa Payares-. Voi pa la cocina, güei voi preparar un puré vexetal que va llevar el to nome.

Entró con fuercia na cocina y nun salió en dengún momentu. Falé colos camareros ún a ún. Cunté-yos l’homenaxe que me facía Payares. Pidí-yos que m’aidaren a agradecé-ylo. Les copes nueves yeren la forma correuta de da-y puxu a esi puré. Tol mundiu me miraba con complicidá. Había una especie d’allegría en tolos preparativos. Segundos enantes qu’abriere Payares&Company llegaron les copes. Darréu punxéronles nes meses pa enllenales con esa delicatessen especial que diben dar a tol mundiu. Mentanto, sirví los cócteles nes copes vieyes. Pasaron pasín a pasu pal comedor. Quedáremos que daríen a toos xuntos el puré pa que tuviere más efeutu. Cuando taben toos degustándolu, Payares salió de la cocina y miró colos sos güeyos de maldá. Enantes que se punxere malu el primer cliente, hubo que llamar a una ambulancia pa que se llevare al chef Payares pal hospital.

Los periódicos falaron que dalgo en mal estáu envelenare a los clientes de Payares&Company. Polo que se ve, na crema vexetal había dalgo tósicu, dalgo que se pegare hasta nes copes dafechu nueves y fuera de toa dulda. La fama del chef Payares esmigayóse ente tanto puré revestíu de nome elegante. Una multa considerable fízo-y tener de facer les sos comíes nun chigre de carretera. En Company convidáronme a reabrir el negociu baxo’l mio lliderazgu. La rempuesta túvela claro. Taba fartu de tantu cocorocó fatu. Volvería a les mios actuaciones por pubs, anque esta vez sedría polos de mediu mundiu. La vida siguía y nun quería dengún otru sustu nella.

NON espublizará de nueves el 20 de xunu a les 9 la mañana, faerálo col poema Sexu. Hasta entós, ta llueu.





.

DESAMOR

Tictac tictac

Esconsona l’aire a les aguyes

que raspien mieloses a tantes

                                hores

                        minutos

                segundos

qu’amosen cariciosu amor

al cuerpu de los cuerpos,

al to cuerpu.

 

                                       Tactic tactic

                                       Esi aire, del que fales,

aforfuga cafiante a eses aguyes

                                       que rasquen dolientes les

                                                               hores

                                                       minutos

                                               segundos,

                                       canses de pimplayos requilorios

                                       y allabanciegues pamplines

                                       qu’esbabayen del to querer.

 

Tictac tictac

                Nun fales asina, amor de mio,

                qu’esfaes el candial llatir de cada

                                               hora

                                       minutu

                                segundu

                trayíos poles foles qu’añeren

                nel roqueru de calmu amorosar

al to cuerpu.

 

Tactic tactic

Falo a los lladríos fonderos,

a les llagarteses ensin corazón,

al espíritu de les hienes,

al afogáu vuelu de les utres,

al corazón que refuga del amor,

al amor que refuga del corazón,

a quien me quiera oyer,

nun siento nada,

siéntolo,

yá nun quiero,

yá nun amo,

yá nun doi blincos,

nin chuchos,

nin mezo’l mio cuerpu col to cuerpu,

nin caltrio’l to sudu pente’l mio chirlotar,

yá nun te quiero,

yá nun t’amo,

yá non,

non.

       

 NON espublizará de nueves el 6 de xunu a les 9 la mañana, faerálo con una flash fiction de Los Payares entitulada La Vida Siguía. Hasta entós, ta llueu.

 

 

.

.

                       

EL CLUB LOS FUNCIONARIOS MUERTOS

El casinu viose acongoxáu pola entrada de doña Olvidu, pingando tristura per tolos papos, cola urna de cenices de la so amiga, amás de presidenta, doña Severa Payares de la Figal Florida. El silenciu acompañóla hasta la sala xuntes de la tertulia femenina Benedictine del Santísimu Sepulcru Sacru y Puru, onde taben a esperala les otres cofrades sollutando, asina como dexando escapar pallabres d’alcordanza pa la que fuere exemplu vivu de trabayu y moral. Una cualquiera d’elles, ensin da-y mayor importancia, dexó cayer a les oreyes famientes de verdá que gracies a la piadosa difunta hubiere grandes meyores nes sielles heredaes de los sos finaos maríos, y qu’agora, a la fin, yeren merecedores de qu’elles aposentaren les sos sagraes retaguardies nes xuntes de la cofradería. Cada siella tenía’l nome del propietariu, pasáu a meyor vida, estampáu nunes vulgares lletres blanques sobre un apolmonáu negru fonderu. Doña Severa, muyer sabia onde les haiga, desixó que cambiaren tantu lletreru pocilgueru por dalgo de más ringorrangu: unes sublimes lletres tonu xampán allegrando un divín gris antracita.

-Nun soi a remembrar les caberes pallabres de la tan querida doña Severa…, nin anque quisiere…, son los nervios del momentu -dicía la servicial doña Olvidu de la que s’empapizaba de tristura al entrar na atarraquitada sala. Naide nun la escuchó, como siempre.

Unes manes, un migayín utres, garraron la urna de les celestiales cenices y averáronla a la boca, un chuchu surdió d’ella, dexando’l carmín como prueba. Desiguida entamaron a oyise glayíos histéricos, dando’l pistoletazu de salida al viacruzis que los restos de la difunta tuvieron de pasar. Tando tolos carmines esparramaos pela cabera morada de doña Severa, ésta zarapicó de les manes que la coyíen, dio delles vueltes nel aire y dexóse atrapar por doña Modesta, que soltó l’habitual risuca bruxa y faló cola so voz de barítonu d’una misa gospel.

-¡Aselái, parecéis neñes! ¿Nun vos da vergoña? Tamos equí pa rendir homenaxe a la cofrade Severa Payares de la Figal Florida, non pa montar una bacanal –el silenciu espardióse per tola sala-. Vamos ser civilizaes –dexó un teatral callar ente’l so auditoriu-. Alcordáisvos del arremangu que sacó cuando la fatada de Praceres. Cuido que fue la causa del so desgraciáu desparrame celebral.

Remembraron tolos llevantos qu’aquella creatura de llingua suelta soltare nel senciosu xuiciu que-y ficieren naquella sala. Doña Severa tinía midies toles asentaes pallabres d’acusación mentanto Praceres esbarraba ensin xacíu cada vez qu’intentaba finar cola moral de tan cabal dama. La presidenta escomencipió a recitar unos versos de Santa Teresa de Xesús, inspiradora de les normes d’una sociedá razonable, llogrando asina que les palombes trinitaries asistentes a aquella epifanía comieren alpiste de la so mansulina mano, a la par que-y avisaba a la pecadora que si nun almitía los sos pecaos taria condenada al fueu purificador de la vida.

-Yá m’alcuerdo…, yá m’alcuerdo… -cortó les remembrances coleutives doña Olvidu.

-Calla, pazgüata. Dexa qu’afondemos naquella intervención d’antoloxía de Doña Severa. Tamos fartes de les tos babayaes –espetó-y enraxonada doña Modesta.

Tornó la espiritual maxa al llugar, aposando les pallabres de tan tienra xusticiera nes boques de les asistentes al actu final de la so presidencia. Doña Severa empobinó’l so discursu a la moral, ún de los pegoyos nel que se sofitaba la tertulia femenina Benedictine del Santísimu Sepulcru Sacru y Puru. Fo cuando la Praceres-y espetó que l’asociación sedría meyor llamada’l Club los Funcionarios Muertos, mancando a la memoria de los homes de tan fervoroses dames, trabayadores en vida de la Ca Conceyu. Doña Severa sufrió un esvanecimientu pola mor de les pallabres d’aquella sacabera escocía. Atendida nel actu, fo pasiquín a pasu volviendo a esti mundiu. Malpenes garrada fuerza, viose obligada pola Praceres a ser sincera.

-¡Guaxa zafallona! ¡Avergóñate de lo felpeya que yes! Mira que pasiar peles cais llendantes col casinu, p’arriba y p’abaxo, p’arriba y p’abaxo, coyida del brazu d’Agustín, el boy del club de les afueres. Amás, ficístelo a les hores que salíemos de misa, arrastrando pelos suelos el nome d’esta lleal tertulia.

-¡Y les ganes que teníeis de tar nel mio llugar! Anda que nun vos vía yo con cara d’allampiar un chuchín. ¡Qué tamos vieyes y llibres y nun tenemos tiempu de perder!

-¡Faraguya del diañu! ¡Calla y dexa de pecar con esa llingua de borrica rastriega! Incumpliste caún de los mandaos d’esta cofradería. ¡Quedes fuera d’esta asociación de por vida! Amás, quítote la siella del que fuere’l to maríu. ¡El probe, nun merecía esto!

-Pero…, si yere un puteru de los coyones… Bueno, como tolos vuestros…

Doña Severa sufrió otru esvanecimientu delantre aquella otomía de la Praceres. Tuvo de rompese la crisma si nun fuere pola rápida rempuesta de doña Olvidu, que recoyóla en volanderes enantes de llegar al suelu. El velenu la Praceres nun tenía fin, riose del anxelín y llevantóse les faldes, dexando la regaña a la vista toes, yá que la mui bederre nun llevaba bragues. Menos mal que toes refugaron de la visión y colaron alborotaes a rezar a la ilesia por tan zarrapastrosa muyer.

-Yá m’alcuerdo, yá m’alcuerdo… Doña Severa dexóme esta carta empobinada pa toes nosotres –glayó doña Olvidu delantre la mirada ablucada de les compañeres. Doña Modesta, qu’exercía de presidenta por asentimientu democráticu, arrampuñó’l sobre de les manes de la fata y lleó n’alto:

“Estimaes collacies na decencia y les bones costumes, tengo de suplicavos que llevéis p’alantre esti’l mio últimu deséu: espardíi les mios cenices pente les santes sábanes sudaes pol nuesu cofrade secretu nel amor, Agustín”.

ESTA FLASH FICTION SURDIÓ NUN PASÉU PELA PLAYA PONIENTE, COLA COLLABORACIÓN DE NOR, NORBERTU MARTÍN, SIEMPRE PRIMER LLECTOR DE TOLO QU'ESCRIBO, FACIENDO'L LLABOR D'EDITOR. D'ESTA MENA, QUEREMOS DESEYAVOS LOS DOS UN BON DÍA DE LES LLETRES ASTURIANES EL 6 DE MAYU. NON TORNARÁ CON TOOS VOS EL 16 DE MAYU COL POEMA DESAMOR. HASTA ENTÓS, TA LLUEU.


.